அல்லாஹ்வோ அல்லது அவன் அனுமதி வழங்கியவர்களோ அன்றி வேறு எவரும் எதனையும் ஹலால் அல்லது ஹராம் ஆக்க முடியாது

இப்னு அப்பாஸ் (ரழி), முஜாஹித், அழ்-ழஹ்ஹாக், கதாதா, அப்துர்-ரஹ்மான் பின் ஸைத் பின் அஸ்லம் மற்றும் பலர் கூறினார்கள்: "இணைவைப்பாளர்கள் தாங்களாகவே சிலவற்றை ஹலாலாகவும் (அனுமதிக்கப்பட்டவை), சிலவற்றை ஹராமகாவும் (தடுக்கப்பட்டவை) ஆக்கிக் கொண்டதைக் கண்டிப்பதற்காகவே இந்த வசனம் (ஆயத்) அருளப்பட்டது. உதாரணமாக பஹீரா, ஸாயிபா மற்றும் வஸீலா போன்றவை." அல்லாஹ் கூறுவது போல்: ﴾وَجَعَلُواْ لِلَّهِ مِمَّا ذَرَأَ مِنَ الْحَرْثِ وَالاٌّنْعَامِ نَصِيباً﴿
(அல்லாஹ் படைத்த விளைச்சல்களிலும் கால்நடைகளிலும் அவனுக்கு ஒரு பங்கை அவர்கள் ஒதுக்குகிறார்கள்.) 6:136

இமாம் அஹ்மத் அவர்கள் மாலிக் பின் நள்லா (ரழி) வழியாக ஒரு செய்தியைப் பதிவு செய்துள்ளார்கள். அவர் கூறினார்: "நான் அழுக்கான ஆடைகளுடன் அல்லாஹ்வின் தூதர் (ஸல்) அவர்களிடம் வந்தேன். அவர்கள், ﴾«هَلْ لَكَ مَالٌ؟»﴿ (உன்னிடம் செல்வம் இருக்கிறதா?) என்று கேட்டார்கள். அதற்கு நான், 'ஆம்' என்று பதிலளித்தேன். அவர்கள், ﴾«مِنْ أَيِّ الْمَالِ؟»﴿ (எவ்வகையான செல்வம்?) என்று கேட்டார்கள். 'ஒட்டகங்கள், அடிமைகள், குதிரைகள், ஆடுகள் என அனைத்து வகைகளும் உள்ளன' என்று நான் பதிலளித்தேன். அதற்கு அவர்கள், ﴾«إِذَا آَتَاكَ اللَّهُ مَالًا فَلْيُرَ عَلَيْك»﴿ (அல்லாஹ் உனக்குச் செல்வத்தை வழங்கினால், அதன் அடையாளம் உன்னில் காணப்படட்டும்) என்று கூறினார்கள்."

பிறகு அவர்கள், ﴾«هَلْ تُنْتَجُ إِبْلُكَ صِحَاحًا آذَانُهَا، فَتَعْمِدَ إِلَى مُوسًى فَتَقْطَعَ آذَانَهَا، فَتَقُولُ: هَذِهِ بُحْرٌ، وَتَشُقُّ جُلُودَهَا وَتَقُولُ: هَذِهِ صُرُمٌ، وَتُحَرِّمُهَا عَلَيْكَ وَعَلَى أَهْلِك»﴿
؟ (உனது ஒட்டகங்கள் ஆரோக்கியமான காதுகளுடன் பிறக்கும்போது, நீ ஒரு கத்தியை எடுத்து அவற்றின் காதுகளை அறுத்துவிட்டு, 'இது பஹ்ர்' என்றும், அதன் தோலைக் கிழித்துவிட்டு 'இது ஸர்ம்' என்றும் கூறி, உனக்கும் உன் குடும்பத்தாருக்கும் அவற்றை ஹராமாக்கி விடுகிறாயா?) என்று கேட்டார்கள். நான் 'ஆம்' என்றேன். அவர்கள் கூறினார்கள், ﴾«فَإِنَّ مَا آتَاكَ اللهُ لَكَ حِلٌّ، سَاعِدُ اللهِ أَشَدُّ مِنْ سَاعِدِكَ، وَمُوسَى الله أَحَدُ مِنْ مُوسَاك»﴿ (அல்லாஹ் உனக்கு வழங்கியவை உனக்கு ஹலால் ஆகும். அல்லாஹ்வின் ஆற்றல் (முன்கை) உனது ஆற்றலை விடவும் வலிமையானது, மேலும் அல்லாஹ்வின் கத்தி உனது கத்தியை விடவும் கூர்மையானது.)" அவர் இந்த ஹதீஸை முழுமையாகக் குறிப்பிட்டார். இந்த ஹதீஸின் அறிவிப்பாளர் தொடர் மிகவும் வலுவானதும் சிறந்ததுமாகும்.

அல்லாஹ் ஹராமாக்கியதை ஹலாலாகவும், ஹலாலாக்கியதை ஹராமாகவும் ஆக்குபவர்களை அல்லாஹ் கண்டிக்கிறான். ஏனெனில் இச்செயல்கள் எந்தவொரு ஆதாரமும் சான்றுமின்றி, வெறும் மன இச்சைகளையும் தவறான கருத்துகளையும் அடிப்படையாகக் கொண்டவை. பிறகு அல்லாஹ் அவர்களுக்கு மறுமை நாளைக் குறித்து எச்சரிக்கை விடுத்தான்.

அவன் கேட்டான்: ﴾وَمَا ظَنُّ الَّذِينَ يَفْتَرُونَ عَلَى اللَّهِ الْكَذِبَ يَوْمَ الْقِيَـمَةِ﴿ (அல்லாஹ்வின் மீது பொய்யை இட்டுக்கட்டுபவர்கள், மறுமை நாளைப் பற்றி என்ன நினைக்கிறார்கள்?) மறுமை நாளில் அவர்கள் நம்மிடம் திரும்பும்போது தங்களுக்கு என்ன நேரிடும் என்று அவர்கள் கருதுகிறார்கள்?

"நிச்சயமாக அல்லாஹ் மனிதகுலத்தின் மீது பெரும் அருளுடையவன்" ﴾إِنَّ اللَّهَ لَذُو فَضْلٍ عَلَى النَّاسِ﴿ என்ற அல்லாஹ்வின் கூற்றுக்கு, "இவ்வுலகில் அவர்களுக்குரிய தண்டனையைத் தாமதப்படுத்துவதே அந்த அருளாகும்" என்று இப்னு ஜரீர் கூறினார். நான் (இப்னு கதீர்) கூறுகிறேன்: "மனிதர்களுக்குரிய அந்த அருள் என்பது, இவ்வுலகிலோ அல்லது அவர்களின் மார்க்கத்திலோ அவர்களுக்குப் பயன் தரும் நன்மைகளை அல்லாஹ் அனுமதித்துள்ளதைக் குறிக்கலாம். மேலும், இவ்வுலகிலும் மறுமையிலும் அவர்களுக்குத் தீங்கு விளைவிக்கக்கூடியவற்றைத் தவிர வேறெதனையும் அவன் அவர்களுக்குத் தடை செய்யவில்லை." ﴾وَلَـكِنَّ أَكْثَرَهُمْ لاَ يَشْكُرُونَ﴿ (ஆயினும் அவர்களில் பெரும்பாலோர் நன்றி செலுத்துவதில்லை.)

எனவே, அல்லாஹ் அவர்களுக்கு வழங்கிய அருட்கொடைகளை அவர்களே தடுத்துக்கொண்டதுடன், தங்களுக்குத் தாங்களே நெருக்குடியையும் சிரமத்தையும் ஏற்படுத்திக் கொண்டனர். அவர்கள் சிலவற்றை ஹலாலாகவும் சிலவற்றை ஹராமாகவும் ஆக்கிக் கொண்டனர்.

இணைவைப்பாளர்கள் தமக்கெனச் சட்டங்களை வகுத்தபோது இவ்வாறே செய்தார்கள். அதேபோல் வேதக்காரர்களும் தங்கள் மார்க்கத்தில் புதிய மாற்றங்களை (பித்அத்) புகுத்தியபோது இவ்வாறே செய்தார்கள்.