அல்லாஹ்வின் தூதர் (ஸல்) அவர்களின் புதல்வி (ஜைனப் - ரழி) மரணமடைந்தபோது, (அவரைக் குளிப்பாட்டுவது குறித்து) நாங்கள் அல்லாஹ்வின் தூதர் (ஸல்) அவர்களிடம் கேட்டோம். அதற்கு அவர்கள், "அவரை மூன்று அல்லது ஐந்து முறை அல்லது நீங்கள் (அவசியம் என்று) கருதினால் அதைவிட அதிகமாகவோ ஒற்றைப்படை எண்ணிக்கையில் குளிப்பாட்டுங்கள். கடைசி (முறை குளிப்பாட்டும்) போது கற்பூரத்தை அல்லது சிறிதளவு கற்பூரத்தைச் சேர்த்துக் கொள்ளுங்கள். நீங்கள் (குளிப்பாட்டி) முடித்ததும் எனக்குத் தெரிவியுங்கள்" என்று கூறினார்கள்.
நாங்கள் (குளிப்பாட்டி) முடித்ததும் அவர்களுக்குத் தெரிவித்தோம். அப்போது அவர்கள் தமது கீழாடையை (இஸாரை) எங்களிடம் தந்து, "இதை அவரது உடலோடு ஒட்டிய ஆடையாக (கபனில் முதலாவதாக) அணிவியுங்கள்" என்று கூறினார்கள். நாங்கள் அவரது தலைமுடியை - முன்நெற்றி முடி மற்றும் இரு பக்க முடிகள் என - மூன்று சடைகளாகப் பின்னி, அவற்றை அவருக்குப் பின்புறமாகப் போட்டோம்.
மற்றொரு அறிவிப்பில் உம்மு அதிய்யா (ரழி) அவர்கள், "நாங்கள் அவரது தலைமுடியை மூன்று சடைகளாக வாரினோம்" என்று அறிவிக்கிறார்கள்.