இப்னு ஜுரைஜ் அறிவித்தார்கள்:

அதாஃ கூறினார்கள்: "ஜாபிர் பின் அப்துல்லாஹ் (ரழி) அவர்கள், 'நபி (ஸல்) அவர்கள் ஈதுல் ஃபித்ர் பெருநாள் அன்று (தொழுதிடத்துக்குப்) புறப்பட்டு, குத்பா நிகழ்த்துவதற்கு முன்பு தொழுகையைத் தொடங்கினார்கள்' என்று கூறினார்கள்."

(பிறகு) அதாஃ என்னிடம் கூறினார்கள்: "இப்னு அப்பாஸ் (ரழி) அவர்கள் இப்னு அஸ்ஸுபைர் (ரழி) அவர்களுக்கு, அவர் பைஅத் (விசுவாசப் பிரமாணம்) பெறப்பட்ட ஆரம்ப நாட்களில் ஒரு செய்தியை அனுப்பியிருந்தார்கள்; அதில், 'ஈதுல் ஃபித்ர் பெருநாள் தொழுகைக்கு அதான் சொல்லப்படுவதில்லை; தொழுகைக்குப் பிறகுதான் குத்பா' என்று குறிப்பிட்டிருந்தார்கள்."

(மேலும்) அதாஃ என்னிடம் கூறினார்கள்: "இப்னு அப்பாஸ் (ரழி) அவர்களும் ஜாபிர் பின் அப்துல்லாஹ் (ரழி) அவர்களும், 'ஈதுல் ஃபித்ர் மற்றும் ஈதுல் அழ்ஹா (நாட்களில்) அதான் சொல்லப்படுவதில்லை' என்று கூறியதாக."

(மேலும்) அதாஃ கூறினார்கள்: "ஜாபிர் பின் அப்துல்லாஹ் (ரழி) அவர்கள் கூறுவதை நான் கேட்டேன்: 'நபி (ஸல்) அவர்கள் எழுந்து தொழுகையைத் தொடங்கினார்கள்; பிறகு மக்களுக்கு குத்பா நிகழ்த்தினார்கள். அல்லாஹ்வின் நபி (ஸல்) அவர்கள் (குத்பாவை) முடித்ததும், (கீழே) இறங்கி பெண்களிடம் சென்றார்கள். பிலால் (ரழி) அவர்களின் கையில் சாய்ந்தவாறு அவர்களுக்கு உபதேசம் செய்தார்கள். பிலால் (ரழி) அவர்கள் தமது ஆடையை விரித்துக் கொண்டிருக்க, பெண்கள் அதில் தர்மப் பொருட்களை இட்டுக் கொண்டிருந்தார்கள்.' "

நான் (இப்னு ஜுரைஜ்) அதாஃவிடம் கேட்டேன்: "ஓர் இமாம் (பணிகளிலிருந்து) விடுபட்டதும் பெண்களிடம் சென்று அவர்களுக்கு உபதேசம் செய்வது இப்போது அவர் மீது கடமை என்று நீங்கள் கருதுகிறீர்களா?" அதாஃ கூறினார்கள்: "நிச்சயமாக அது அவர்கள் மீதான கடமையாகும்; அவர்கள் ஏன் அவ்வாறு செய்யக்கூடாது?"

ஜாபிர் இப்னு அப்துல்லாஹ் (ரலி) அவர்கள் கூறியதாவது:

நபி (ஸல்) அவர்கள் ஈதுல் ஃபித்ர் நாளில் (தொழுகைத் திடலில்) எழுந்து நின்று, குத்பாவுக்கு (சொற்பொழிவுக்கு) முன்பே தொழுகையைத் துவங்கித் தொழுதார்கள். பிறகு மக்களுக்கு உரை நிகழ்த்தினார்கள். அல்லாஹ்வின் தூதர் (ஸல்) அவர்கள் (உரையை) முடித்ததும், (மிம்பரிலிருந்து) இறங்கிப் பெண்களிடம் சென்று, அவர்களுக்கு (மார்க்கத்தை) நினைவூட்டி உபதேசித்தார்கள். அப்போது அவர்கள் பிலால் (ரலி) அவர்களின் கையின் மீது சாய்ந்திருந்தார்கள். பிலால் (ரலி) தமது ஆடையை விரித்து வைத்திருக்க, பெண்கள் (தங்கள்) தர்மப் பொருட்களை அதில் போட்டார்கள்.

(இதைக் கேட்ட அறிவிப்பாளர் இப்னு ஜுரைஜ் ஆகிய) நான் அதாவிடம், "(அது) நோன்புப் பெருநாள் ஜகாத்தா (ஸதகத்துல் ஃபித்ரா)?" என்று கேட்டேன். அதற்கு அவர், "இல்லை; ஆனால், அது அவர்கள் அந்த நேரத்தில் தர்மம் செய்துகொண்டிருந்த (உபரியான) தர்மமாகும். ஒரு பெண் தனது மோதிரத்தைப் போடுவார்; (இப்படியே) மற்றவர்களும் போடுவார்கள்; மற்றவர்களும் போடுவார்கள்" என்று கூறினார்.

நான் அதாவிடம், "இமாம் (உரையை) முடித்த பிறகு, இப்போது பெண்களிடம் வந்து அவர்களுக்கு நினைவூட்டுவது இமாம் மீது கடமையா?" என்று கேட்டேன். அதற்கு அவர், "ஆம், என் வாழ்வின் மீது ஆணையாக! இது அவர்கள்மீது கடமையாகும். இதைச் செய்யாமல் இருக்க அவர்களுக்கு என்ன நேர்ந்தது?" என்று கூறினார்.

ஜாபிர் இப்னு அப்துல்லாஹ் (ரழி) அவர்கள் அறிவித்தார்கள்:
நபி (ஸல்) அவர்கள் நோன்புப் பெருநாள் அன்று (தொழுவதற்காக) எழுந்து நின்று தொழுகையை நிறைவேற்றினார்கள். அவர்கள் சொற்பொழிவுக்கு முன் தொழுகையை ஆரம்பித்தார்கள். பின்னர் மக்களுக்கு உரை நிகழ்த்தினார்கள். நபி (ஸல்) அவர்கள் (சொற்பொழிவை) முடித்ததும் (மிம்பரில் இருந்து) இறங்கிப் பெண்களிடம் வந்தார்கள். பிலால் (ரழி) அவர்களின் கையில் சாய்ந்தவாறு அவர்களுக்கு அறிவுரை வழங்கினார்கள். பிலால் (ரழி) தமது ஆடையை விரித்திருக்க, அதில் பெண்கள் தர்மத்தை இட்டார்கள். "ஒரு பெண் தனது 'ஃபதக்' (எனும் ஒரு வகை) மோதிரத்தை இட்டாள்; (மற்றப் பெண்களும் தங்கள் ஆபரணங்களையும் தர்மங்களையும்) தொடர்ந்து இட்டார்கள்" என்று (ஜாபிர்) கூறினார்.