அனஸ் பின் சீரின் அறிவித்தார்கள்:
"நாங்கள் அனஸ் பின் மாலிக் (ரழி) அவர்கள் ஷாமிலிருந்து (திரும்பி) வந்தபோது, 'ஐன் அத்தமர்' என்னுமிடத்தில் அவர்களைச் சந்தித்தோம். அப்போது அவர்கள் தமது கழுதையின் மீது தொழுதுகொண்டிருந்ததை நான் கண்டேன். அவர்களது முகம் அந்தப் பக்கமாக இருந்தது." - (அறிவிப்பாளர்) ஹம்மாம் கிப்லாவின் இடதுபுறமாகச் சைகை செய்தார். - "ஆகவே நான் அவர்களிடம், 'நீங்கள் கிப்லா அல்லாத திசையை நோக்கித் தொழுதுகொண்டிருப்பதை நான் காண்கிறேனே?' என்று கேட்டேன். அதற்கு அவர்கள், 'அல்லாஹ்வின் தூதர் (ஸல்) அவர்கள் இவ்வாறு செய்வதை நான் பார்த்திராவிட்டால், நானும் இப்படிச் செய்திருக்க மாட்டேன்' என்று கூறினார்கள்."