அபூ ஸலமா (ரழி) அவர்கள் அறிவித்தார்கள்:
அவர் ஆயிஷா (ரழி) அவர்களிடம் அல்லாஹ்வின் தூதர் (ஸல்) அவர்களின் இரவுத் தொழுகையைப் பற்றிக் கேட்டார்கள். அதற்கு அவர்கள் கூறினார்கள்: "அவர்கள் பதிமூன்று ரக்அத்கள் தொழுவார்கள். அவர்கள் எட்டு ரக்அத்கள் தொழுவார்கள், பின்னர் வித்ர் தொழுவார்கள், பிறகு அமர்ந்த நிலையில் இரண்டு ரக்அத்கள் தொழுவார்கள். அவர்கள் ருகூஃ செய்ய விரும்பும்போது, எழுந்து நின்று ருகூஃ செய்வார்கள். மேலும், அவர்கள் ஸுப்ஹு தொழுகையின் அதானுக்கும் இகாமத்திற்கும் இடையில் இரண்டு ரக்அத்கள் தொழுதார்கள்."

ஆயிஷா (ரழி) அவர்கள் அறிவித்தார்கள்:
அல்லாஹ்வின் தூதர் (ஸல்) அவர்கள் இரவில் பதிமூன்று ரக்அத்கள் தொழுவார்கள்; ஃபஜ்ர் தொழுகைக்கான அழைப்பொலியை கேட்டதும், இரண்டு இலேசான ரக்அத்கள் தொழுவார்கள்.

யஹ்யா எனக்கு மாலிக் அவர்களிடமிருந்தும், மாலிக் அவர்கள் ஹிஷாம் இப்னு உர்வா அவர்களிடமிருந்தும், ஹிஷாம் இப்னு உர்வா அவர்கள் தம் தந்தை (உர்வா) அவர்களிடமிருந்தும், அவர் (உர்வா) உம்முல் முஃமினீன் ஆயிஷா (ரழி) அவர்கள் (பின்வருமாறு) கூறினார்கள் என அறிவித்தார்கள்: "அல்லாஹ்வின் தூதர் (ஸல்) அவர்கள் இரவில் பதிமூன்று ரக்அத்கள் தொழுவார்கள், பின்னர் ஸுப்ஹு தொழுகைக்கான அதானை கேட்டதும் இரண்டு ரக்அத்கள் தொழுவார்கள்."