அல்லாஹ்வின் தூதர் (ஸல்) அவர்கள், மாலை நேரத் தொழுகைகளில் ஒன்றான லுஹர் அல்லது அஸர் தொழுகையை எங்களுக்குத் தொழுவித்தார்கள். அவர்கள் இரண்டு ரக்அத்களில் ஸலாம் கொடுத்தார்கள். பிறகு பள்ளிவாசலின் கிப்லாத் திசையில் இருந்த ஒரு மரக்கட்டையின் அருகே சென்று, கோபத்திலிருப்பவர் போன்று அதன் மீது சாய்ந்து கொண்டார்கள். மக்களில் அபூபக்கர் (ரலி) அவர்களும் உமர் (ரலி) அவர்களும் இருந்தனர். அவ்விருவரும் (நபியவர்களிடம்) பேச அஞ்சினர். (தொழுகை முடிந்துவிட்டதென எண்ணி) அவசரமாகச் செல்பவர்கள் பள்ளிவாசலிலிருந்து வெளியேறி, 'தொழுகை சுருக்கப்பட்டுவிட்டது' என்று (பேசிக் கொண்டு) சென்றனர்.
அப்போது 'துல்யதைன்' (என்ற நபித்தோழர்) எழுந்து, 'அல்லாஹ்வின் தூதரே! தொழுகை குறைக்கப்பட்டுவிட்டதா? அல்லது தாங்கள் மறந்துவிட்டீர்களா?' என்று கேட்டார். நபி (ஸல்) அவர்கள் வலது புறமும் இடது புறமும் பார்த்துவிட்டு, 'துல்யதைன் என்ன சொல்கிறார்?' என்று கேட்டார்கள். மக்கள், 'அவர் உண்மையைத்தான் சொல்கிறார்; தாங்கள் இரண்டு ரக்அத்கள்தாம் தொழுதீர்கள்' என்று கூறினர்.
ஆகவே, நபி (ஸல்) அவர்கள் (விடுபட்ட) இரண்டு ரக்அத்களைத் தொழுது ஸலாம் கொடுத்தார்கள். பிறகு தக்பீர் கூறி ஸஜ்தாச் செய்தார்கள்; பிறகு தக்பீர் கூறி (தலையை) உயர்த்தினார்கள்; பிறகு தக்பீர் கூறி ஸஜ்தாச் செய்தார்கள்; பிறகு தக்பீர் கூறி (தலையை) உயர்த்தினார்கள்.
(அறிவிப்பாளர் முஹம்மத் பின் சீரீன் கூறுகிறார்:) இம்ரான் பின் ஹுஸைன் (ரலி) அவர்கள் வாயிலாக எனக்கு அறிவிக்கப்பட்டது: '(சஹ்வுடைய ஸஜ்தாவிற்குப்) பிறகு நபி (ஸல்) அவர்கள் ஸலாம் கொடுத்தார்கள்' என்று இம்ரான் (ரலி) கூறினார்.