ஜாபிர் (ரழி) அவர்கள் அறிவித்தார்கள்: அல்லாஹ்வின் தூதர் (ஸல்) அவர்கள் ஹஜ்ஜத்துல் வதாவின்போது (இறுதி ஹஜ்ஜின்போது) தமது சவாரி ஒட்டகத்தின் மீது (அமர்ந்தவாறு) (கஅபா) இல்லத்தை வலம் வந்தார்கள்; மேலும் தமது கைத்தடியால் (ஹஜருல் அஸ்வத்) கல்லைத் தொட்டார்கள். மக்கள் தங்களைப் பார்க்க வேண்டும் என்பதற்காகவும், அவர்கள் நன்கு தெரிய வேண்டும் என்பதற்காகவும், மேலும் மக்கள் தம்மைச் சூழ்ந்து திரண்டிருந்ததால் அவர்கள் தம்மிடம் (மார்க்கம் தொடர்பான கேள்விகளைக்) கேட்க இயல வேண்டும் என்பதற்காகவும் (இவ்வாறு செய்தார்கள்).

ஜாபிர் இப்னு அப்துல்லாஹ் (ரழி) அவர்கள் அறிவித்தார்கள்: அல்லாஹ்வின் தூதர் (ஸல்) அவர்கள் ஹஜ்ஜத்துல் விதாவின்போது, மக்கள் தங்களைப் பார்க்கவும், தாங்கள் நன்கு வெளிப்படவும், மேலும் மக்கள் தங்களிடம் (மார்க்க விஷயங்களைக் குறித்துக்) கேட்க இயலவும் வேண்டும் என்பதற்காக, தமது பெண் ஒட்டகத்தின் மீதமர்ந்து (கஅபா) இல்லத்தை வலம் வந்ததுடன், ஸஃபாவிற்கும் மர்வாவிற்கும் இடையில் (ஸஃயீயும்) செய்தார்கள்; (அப்போது) அவர்களைச் சுற்றிலும் மக்கள் திரண்டிருந்தனர்.

இப்னு கஷ்ரம் அவர்கள் வழியாக அறிவிக்கப்படும் ஹதீஸில், பின்வரும் குறிப்பு இடம்பெறவில்லை:
"அவர்கள் தங்களிடம் கேட்க வேண்டும் என்பதற்காக."