காலித் பின் அஸ்லம் அவர்கள் கூறினார்கள்:
நாங்கள் அப்துல்லாஹ் பின் உமர் (ரலி) அவர்களுடன் புறப்பட்டுச் சென்றோம். அப்போது ஒரு கிராமவாசி, "{வல்லதீன யக்னிஸூனத் தஹப வல் ஃபிழ்ழத வலா யுன்ஃபிகூனஹா ஃபீ ஸபீலில்லாஹ்} (யார் பொன்னையும் வெள்ளியையும் சேமித்து வைத்துக்கொண்டு, அவற்றை அல்லாஹ்வின் பாதையில் செலவிடாமல் இருக்கிறார்களோ...)" எனும் அல்லாஹ்வின் கூற்றைப் பற்றி எனக்கு அறிவியுங்கள் என்று கேட்டார்.
இப்னு உமர் (ரலி) அவர்கள் கூறினார்கள்: "யார் அவற்றைச் சேமித்து வைத்து, அவற்றிற்குரிய ஜகாத்தை நிறைவேற்றவில்லையோ அவருக்குக் கேடுதான். இது ஜகாத் (சட்டம்) அருளப்படுவதற்கு முன்னால் (இருந்த நிலை) ஆகும். எப்போது அது அருளப்பட்டதோ, அப்போது அல்லாஹ் அதனை செல்வங்களைத் தூய்மைப்படுத்தக்கூடியதாக ஆக்கிவிட்டான்."