ஆயிஷா (ரழி) அவர்கள் அறிவித்தார்கள்:
நபி (ஸல்) அவர்கள் நோயாளிக்கு (சிகிச்சை அளிக்கும்போது), “அல்லாஹ்வின் பெயரால்! நமது பூமியின் மண்ணும், நம்மில் சிலரின் உமிழ்நீரும் (சேர்ந்து, நோயுற்றவரின் மீது பூசப்படும்போது), நமது இறைவனின் அனுமதியைக் கொண்டு நமது நோயுற்றவர் குணமடைவார்” என்று கூறுவார்கள்.

ஆயிஷா (ரழி) அவர்கள் கூறினார்கள்:
நபி (ஸல்) அவர்கள், ஒரு மனிதர் (தமக்கு ஏற்பட்ட) நோய்குறித்து முறையிட்டால், (தமது விரலைத்) தமது உமிழ்நீரால் நனைத்து, பின்னர் அதை மண்ணில் தோய்த்து (அந்த மண்ணை நோயாளிக்குத் தடவிக்கொண்டு), (பின்வருமாறு) ஓதுவார்கள்:
"எங்களின் பூமியின் மண்; எங்களில் சிலரின் உமிழ்நீருடன் (சேர்கிறது). எங்கள் இறைவனின் அனுமதியுடன் எங்களின் நோயாளி குணமடைகிறார்."

ஆயிஷா (ரழி) அவர்கள் அறிவித்தார்கள்: நபி (ஸல்) அவர்கள் நோயாளிக்காக (தமது) விரலில் உமிழ்நீரை வைத்துக்கொண்டு (அதை மண்ணில் தோய்த்து) கூறும் விஷயங்களில் இதுவும் ஒன்றாகும்:
“பிஸ்மில்லாஹ், பிதுர்ப(த்)தி அர்ழினா, பிரீக(த்)தி பஃழினா, லியுஷ்ஃப ஸகீமுனா பிஇத்னி ரப்பினா.”
(இதன் பொருள்: "அல்லாஹ்வின் பெயரால், எங்களது பூமியின் மண்ணால், எங்களில் சிலரின் உமிழ்நீரால் (இவை இரண்டும் கலக்கப்பட்டு, நோயுற்ற இடத்தின் மீது தடவப்பட்டு), எங்கள் இரட்சகனின் அனுமதியுடன் எங்களில் நோயுற்றிருப்பவர் குணமடையட்டும்.")

ஆயிஷா (ரழி) அவர்கள் அறிவித்தார்கள்:
ஒருவருக்கு ஏதேனும் ஒரு நோய் (அல்லது வலி) ஏற்பட்டால், அல்லது அவருக்கு ஒரு புண் அல்லது காயம் இருந்தால், நபி (ஸல்) அவர்கள் தங்கள் விரலால் இவ்வாறு சைகை செய்வார்கள் (அறிவிப்பாளர் சுஃப்யான் பின் உயைனா அவர்கள் தனது ஆள்காட்டி விரலால் தரையைத் தொட்டு, பின்னர் அதை உயர்த்தி, இந்த சைகையை செய்து காட்டினார்கள்). மேலும் இவ்வாறு ஓதுவார்கள்: 'பிஸ்மில்லாஹி, துர்ப(த்)து அர்ழினா, பிரீக(த்)தி பஃழினா, யுஷ்ஃபா பிஹி சகீமுனா, பி இத்னி ரப்பினா' (அல்லாஹ்வின் பெயரால், எங்களின் பூமியின் மண், எங்களில் சிலரின் உமிழ்நீருடன் (கலந்து), எங்களின் இறைவனின் அனுமதியுடன் எங்களின் நோயாளியைக் குணப்படுத்தும்.)

அல்-புகாரி மற்றும் முஸ்லிம்.