அனஸ் பின் மாலிக் (ரழி) அவர்கள் அறிவித்தார்கள்:
நபி (ஸல்) அவர்கள் கூறினார்கள்: "ஸைத் கொடியை ஏந்தினார்கள்; அவர்கள் ஷஹீதானார்கள். பிறகு அதை ஜஃபர் ஏந்தினார்கள்; அவர்களும் ஷஹீதானார்கள். பிறகு அதை அப்துல்லாஹ் பின் ரவாஹா ஏந்தினார்கள்; அவர்களும் ஷஹீதானார்கள்." – (அப்போது) அல்லாஹ்வின் தூதர் (ஸல்) அவர்களின் கண்கள் கண்ணீர் வடித்துக்கொண்டிருந்தன – "பிறகு காலித் பின் அல்-வலீத் (தளபதியாக) நியமிக்கப்படாமலேயே அதை ஏந்தினார்கள்; அவருக்கு வெற்றி அளிக்கப்பட்டது."

அனஸ் பின் மாலிக் (ரழி) அவர்கள் கூறியதாவது:

நபி (ஸல்) அவர்கள் சொற்பொழிவு நிகழ்த்தியபோது கூறினார்கள்: “ஸைத் (ரழி) கொடியை ஏந்தினார்; அவர் வீரமரணம் அடைந்தார். பிறகு ஜஅஃபர் (ரழி) அதை ஏந்தினார்; அவரும் வீரமரணம் அடைந்தார். பிறகு அப்துல்லாஹ் பின் ரவாஹா (ரழி) அதை ஏந்தினார்; அவரும் வீரமரணம் அடைந்தார். பிறகு காலித் பின் அல்வலீத் (ரழி) (தளபதியாக) நியமிக்கப்படாதிருந்தும் (தானாகவே) அதை ஏந்தினார். அவருக்கு வெற்றி அளிக்கப்பட்டது.” (மேலும்) “(அவர்கள் இந்த உலகத்தில்) நம்முடன் இருப்பது நமக்கு மகிழ்ச்சியளிக்காது” என்று கூறினார்கள்.

(அறிவிப்பாளர்) அய்யூப் (ரஹ்) கூறுகிறார்: அல்லது, “(அவர்கள் இந்த உலகத்தில்) நம்முடன் இருப்பது அவர்களுக்கு மகிழ்ச்சியளிக்காது” என்று கூறினார்கள். (அப்போது) நபி (ஸல்) அவர்களின் இரு கண்களிலிருந்தும் கண்ணீர் வழிந்து கொண்டிருந்தது.