அப்துல்லாஹ் (இப்னு மஸ்ஊத் - ரழி) அவர்கள் கூறினார்கள்:
"பச்சை குத்திவிடும் பெண்கள், (தங்களுக்குப்) பச்சை குத்திக்கொள்ளும் பெண்கள், (அழகிற்காகப் புருவ) முடிகளை அகற்றும் பெண்கள் மற்றும் அழகிற்காகப் பற்களுக்கிடையே இடைவெளி ஏற்படுத்தி, அல்லாஹ்வின் படைப்பை மாற்றும் பெண்கள் ஆகியோரை அல்லாஹ்வின் தூதர் (ஸல்) அவர்கள் சபித்தார்கள்."
இச்செய்தி பனூ அஸத் குலத்தைச் சேர்ந்த, குர்ஆனை (நன்கு) ஓதக்கூடிய 'உம்மு யஅகூப்' எனப்படும் ஒரு பெண்ணுக்கு எட்டியது. அவர் (அப்துல்லாஹ்விடம்) வந்து, "பச்சை குத்திவிடும் பெண்கள், பச்சை குத்திக்கொள்ளும் பெண்கள், முகத்தில் உள்ள முடிகளை அகற்றும் பெண்கள் மற்றும் அழகிற்காகப் பற்களுக்கிடையே இடைவெளி ஏற்படுத்தி, அல்லாஹ்வின் படைப்பை மாற்றும் பெண்கள் ஆகியோரை நீங்கள் சபித்ததாக எனக்கு ஒரு செய்தி எட்டியுள்ளதே, அது என்ன?" என்று கேட்டார்.
அதற்கு அப்துல்லாஹ் (ரழி), "அல்லாஹ்வின் தூதர் (ஸல்) அவர்கள் யாரைச் சபித்தார்களோ அவரை நான் ஏன் சபிக்கக் கூடாது? மேலும், அது அல்லாஹ்வின் வேதத்திலும் (ஆதாரமாக) உள்ளதே!" என்றார்.
அப்பெண்மணி, "நான் குர்ஆனின் இரு அட்டைகளுக்கிடையே உள்ள அனைத்தையும் ஓதியுள்ளேன். ஆனால், அதில் நீங்கள் சொல்வதை நான் காணவில்லையே!" என்றார்.
அதற்கு அவர், "அல்லாஹ்வின் மீதாணையாக! நீ அதை (சரியாகப் புரிந்து) ஓதியிருந்தால், நிச்சயமாக அதைக் கண்டிருப்பாய்" என்று கூறிவிட்டு, பின்னர் (பின்வரும் குர்ஆன் வசனத்தை) ஓதினார்: "{அல்லாஹ்வின் தூதர் உங்களுக்கு எதைக் கொடுக்கிறாரோ அதைப் பெற்றுக்கொள்ளுங்கள்; எதை விட்டும் உங்களைத் தடுக்கிறாரோ அதை விட்டும் நீங்கள் விலகிக் கொள்ளுங்கள்}" (அல்குர்ஆன் 59:7).
அதற்கு அப்பெண்மணி, "இவற்றில் சில காரியங்களை இப்போது உங்கள் மனைவியிடமும் நான் காண்பதாகவே கருதுகிறேன்" என்றார்.
அதற்கு அவர், "நீ (உள்ளே) சென்று பார்" என்றார்.
அப்பெண்மணி அப்துல்லாஹ்வின் மனைவியிடம் சென்று பார்த்தார்; ஆனால் (அவர் சந்தேகித்தது போல்) எதையும் காணவில்லை. பின்னர் அவரிடம் திரும்பி வந்து, "நான் எதையும் காணவில்லை" என்றார்.
அதற்கு அப்துல்லாஹ் (ரழி), "அப்படி (மார்க்கத்திற்கு முரணான) ஏதாவது அவளிடம் இருந்திருந்தால், நான் அவளுடன் (சேர்ந்து) வாழ்ந்திருக்க மாட்டேன்" என்று கூறினார்கள்.