அப்துர் ரஹ்மான் பின் யஸீத் அவர்கள் கூறியதாவது:
உஸ்மான் பின் அஃப்பான் (ரலி) அவர்கள் மினாவில் எங்களுக்கு நான்கு ரக்அத்கள் தொழுகை நடத்தினார்கள். இச்செய்தி அப்துல்லாஹ் பின் மஸ்ஊத் (ரலி) அவர்களிடம் கூறப்பட்டது. அவர்கள் (ஏதேனும் ஒரு விரும்பத்தகாத அல்லது துயரமான நிகழ்வு ஏற்படும்போது கூறப்படும்) ‘இன்னாலில்லாஹி வஇன்னா இலைஹி ராஜிஊன்’ என்று கூறினார்கள். பிறகு, "நான் அல்லாஹ்வின் தூதர் (ஸல்) அவர்களுடன் மினாவில் இரண்டு ரக்அத்கள் தொழுதேன். அபூபக்ர் (ரலி) அவர்களுடனும் மினாவில் இரண்டு ரக்அத்கள் தொழுதேன். உமர் பின் அல்கத்தாப் (ரலி) அவர்களுடனும் மினாவில் இரண்டு ரக்அத்கள் தொழுதேன். நான்கு ரக்அத்களிலிருந்து எனக்குரிய பங்காக, ஏற்றுக்கொள்ளப்பட்ட இரண்டு ரக்அத்கள் அமைந்திருக்கக் கூடாதா!" என்று கூறினார்கள்.