ஜாபிர் (ரழி) அவர்கள் கூறினார்கள்:

நாங்கள் நபி (ஸல்) அவர்களுடன் ‘தாத்துர் ரிகாஃ’ (போரின்) போது இருந்தோம். நாங்கள் நிழல் தரும் ஒரு மரத்திற்கு அருகில் வந்தபோது, அதை நபி (ஸல்) அவர்களுக்காக விட்டுவிட்டோம். நபி (ஸல்) அவர்களின் வாள் அம்மரத்தில் தொங்கிக்கொண்டிருந்த நிலையில் இணைவைப்பாளர்களில் ஒருவர் வந்தார். அவர் அவ்வாளை (உறையிலிருந்து) உருவி, “என்னிடமிருந்து உனக்கு அச்சம் இருக்கிறதா?” என்று கேட்டார். அதற்கு நபி (ஸல்) அவர்கள், “இல்லை” என்றார்கள். அவர், “என்னிடமிருந்து உன்னை யார் தடுப்பார்?” என்று கேட்டார். நபி (ஸல்) அவர்கள், “அல்லாஹ்” என்று கூறினார்கள். உடனே நபி (ஸல்) அவர்களின் தோழர்கள் அவரை மிரட்டினார்கள்.

(பிறகு) தொழுகைக்கு இகாமத் சொல்லப்பட்டது. நபி (ஸல்) அவர்கள் ஒரு சாரருடன் இரண்டு ரக்அத்கள் தொழுதார்கள். பிறகு அவர்கள் பின்னால் சென்றனர். (பிறகு) நபி (ஸல்) அவர்கள் மற்றொரு சாரருடன் இரண்டு ரக்அத்கள் தொழுதார்கள். (மொத்தத்தில்) நபி (ஸல்) அவர்களுக்கு நான்கு ரக்அத்களாகவும், மக்களுக்கு இரண்டு ரக்அத்களாகவும் அமைந்தன.

(அறிவிப்பாளர்) அபூபிஷ்ர் (ரஹ்) அவர்கள் கூறினார்கள்: "அந்த மனிதரின் பெயர் கவ்ரத் பின் அல்-ஹாரித் ஆகும். இந்தப் போரில் நபி (ஸல்) அவர்கள் ‘முஹாரிப் கஸஃபா’ குலத்தாருடன் போரிட்டார்கள்."