ஆயிஷா (ரலி) அவர்கள் கூறினார்கள்:

நபி (ஸல்) அவர்களின் துணைவியர் இரவில் இயற்கைக் கடனை நிறைவேற்றுவதற்காக ‘அல்மனாஸிஉ’ எனும் இடத்திற்குச் செல்வது வழக்கம். அது ஒரு பரந்த திறந்த வெளியாகும். உமர் (ரலி) அவர்கள் நபி (ஸல்) அவர்களிடம், "உங்கள் துணைவியரைத் திரையிட்டு (மறைக்கச்) செய்யுங்கள்" என்று கூறுவார்கள். ஆனால் அல்லாஹ்வின் தூதர் (ஸல்) அவர்கள் (அவ்வாறு) செய்யவில்லை. ஓர் இரவில் இஷா நேரத்தில் நபி (ஸல்) அவர்களின் துணைவியார் ஸவ்தா பின்த் ஸம்ஆ (ரலி) அவர்கள் வெளியே சென்றார்கள். அவர்கள் உயரமான பெண்மணியாக இருந்தார்கள். ஹிஜாப் (திரை மறைவுச் சட்டம்) அருளப்பட வேண்டும் என்ற ஆவலில் உமர் (ரலி) அவர்கள், "ஸவ்தாவே! அறிந்துகொள்; நாங்கள் உன்னை அடையாளம் கண்டுகொண்டோம்" என்று அவரை அழைத்துக் கூறினார்கள். எனவே, அல்லாஹ் 'ஹிஜாப்' பற்றிய வசனத்தை அருளினான்.

நபி (ஸல்) அவர்களின் துணைவியார் ஆயிஷா (ரலி) அவர்கள் அறிவித்தார்கள்:
உமர் பின் அல்கத்தாப் (ரலி) அவர்கள் அல்லாஹ்வின் தூதர் (ஸல்) அவர்களிடம், "தங்கள் மனைவியரைத் திரையிட்டுக்கொள்ளச் செய்யுங்கள்" என்று கூறுவார்கள். ஆனால், அவர்கள் (நபியவர்கள்) அப்படிச் செய்யவில்லை. நபிகளாரின் மனைவியர் இரவில் 'அல்மனாஸிஉ' எனும் (இயற்கை கடன் கழிக்கும்) இடத்திற்குச் செல்வது வழக்கம். (ஒருமுறை) ஸம்ஆவின் மகள் சவ்தா (ரலி) அவர்கள் (வெளியே) சென்றார்கள். அவர்கள் உயரமான பெண்மணியாக இருந்தார்கள். உமர் பின் அல்கத்தாப் (ரலி) அவர்கள் ஒரு சபையில் இருந்தபோது அவர்களைப் பார்த்து, "சவ்தாவே! உன்னை நான் அறிந்துகொண்டேன்" என்று கூறினார்கள். ஹிஜாப் (திரை மறைவு) பற்றிய சட்டம் அருளப்பட வேண்டும் எனும் ஆவலின் காரணமாகவே (அவர் அப்படிக் கூறினார்). (இதனையடுத்து) கண்ணியமிக்கவனும் மகத்துவமிக்கவனுமாகிய அல்லாஹ் 'ஹிஜாப்' பற்றிய வசனத்தை அருளினான்.