அப்துல்லாஹ் இப்னு ஜஃபர் (ரழி) அவர்கள் அறிவித்தார்கள்: அல்லாஹ்வின் தூதர் (ஸல்) அவர்கள் ஒரு பயணத்திலிருந்து திரும்பி வரும்போது, அன்னாரின் குடும்பத்துச் சிறுவர்கள் அவரை வரவேற்பது வழக்கம். இதேபோன்று ஒருமுறை அன்னார் ஒரு பயணத்திலிருந்து திரும்பி வந்தார்கள், நான் தான் முதன் முதலில் அன்னாரிடம் சென்றேன். அன்னார் என்னை தமக்கு முன்னால் (வாகனத்தில்) ஏற்றிக்கொண்டார்கள். பிறகு, ஃபாத்திமா (ரழி) அவர்களின் இரு மகன்களில் ஒருவர் (அன்னாரிடம்) கொண்டுவரப்பட்டார், அவரை அன்னார் தமக்குப் பின்னால் (வாகனத்தில்) ஏற்றிக்கொண்டார்கள். இவ்வாறே நாங்கள் மூவரும் ஒரே பிராணியின் மீது சவாரி செய்தவாறு மதீனாவிற்குள் நுழைந்தோம்.

அப்துல்லாஹ் பின் ஜஃபர் (ரழி) அவர்கள் கூறினார்கள்:
'அல்லாஹ்வின் தூதர் (ஸல்) அவர்கள் ஒரு பயணத்திலிருந்து திரும்பினால், (அவரை வரவேற்க) நாங்கள் (அழைத்துச் செல்லப்பட்டு) அவரைச் சந்திப்போம். (ஒருமுறை) நானும், ஹசன் (ரழி) அல்லது ஹுசைன் (ரழி) அவர்களும் (அவரைச் சந்திக்க) அழைத்துச் செல்லப்பட்டோம். நாங்கள் மதீனாவை வந்தடையும் வரை, அவர்கள் எங்களில் ஒருவரை தங்களுக்கு முன்னாலும், மற்றவரை தங்களுக்குப் பின்னாலும் (தங்கள் வாகனத்தில்) ஏற்றிக்கொண்டார்கள்.'