முஹம்மத் இப்னு அம்ர் இப்னு அதா (ரஹ்) அவர்கள் கூறியதாவது:
நான் என் மகளுக்கு ‘பர்ரா’ என்று பெயரிட்டேன். அப்போது அபூஸலமா அவர்களின் மகளான ஸைனப் (ரலி), "அல்லாஹ்வின் தூதர் (ஸல்) அவர்கள் இப்பெயரைத் தடை செய்துள்ளார்கள்" என்று என்னிடம் கூறினார்கள்.

மேலும் (ஸைனப் (ரலி) அவர்கள்) கூறினார்கள்: "எனக்கும் (ஆரம்பத்தில்) ‘பர்ரா’ என்றே பெயரிடப்பட்டிருந்தது. அப்போது அல்லாஹ்வின் தூதர் (ஸல்) அவர்கள், ‘உங்களை நீங்களே பரிசுத்தமானவர்கள் என்று கூறிக்கொள்ளாதீர்கள்! உங்களில் நன்மை செய்பவர் யார் என்பதை அல்லாஹ்வே நன்கறிவான்’ என்று கூறினார்கள்.

அப்போது (என் குடும்பத்தார் நபியவர்களிடம்), ‘அப்படியானால் இவளுக்கு நாங்கள் என்ன பெயரிடலாம்?’ என்று கேட்டார்கள். அதற்கு நபி (ஸல்) அவர்கள், ‘இவளுக்கு ஸைனப் என்று பெயரிடுங்கள்’ என்று கூறினார்கள்."