அபூ ஷுரைஹ் அல்-கஅபீ (ரலி) அவர்கள் அறிவிக்கிறார்கள்:

அல்லாஹ்வின் தூதர் (ஸல்) அவர்கள் கூறினார்கள்: "அல்லாஹ்வையும் மறுமை நாளையும் நம்பிக்கை கொண்டவர் தம் விருந்தினரைக் கண்ணியப்படுத்தட்டும். அவருக்கான (சிறப்பு) உபசரிப்பு ஓர் இரவும் ஒரு பகலுமாகும். விருந்தோம்பல் மூன்று நாட்களாகும். அதற்குப் பிறகு உள்ளவை தர்மமாகும் (சதகா). (விருந்தளிப்பவரை) சங்கடப்படுத்தும் அளவுக்கு அவரிடம் (விருந்தினர்) தங்கியிருப்பது அவருக்கு ஆகுமானதல்ல."

இஸ்மாயீல் (ரஹ்) அவர்கள் (மாலிக் (ரஹ்) வாயிலாக) இதே ஹதீஸை அறிவித்து, "அல்லாஹ்வையும் மறுமை நாளையும் நம்பிக்கை கொண்டவர் நல்லதைப் பேசட்டும்; அல்லது மௌனமாக இருக்கட்டும்" என்பதைக் கூடுதலாக அறிவித்தார்கள்.

அபூ ஹுரைரா (ரழி) அவர்கள் அறிவிக்கிறார்கள்: அல்லாஹ்வின் தூதர் (ஸல்) அவர்கள் கூறினார்கள்:
அல்லாஹ்வையும் மறுமை நாளையும் ஈமான் கொண்டவர் நல்லதைப் பேசட்டும் அல்லது மௌனமாக இருக்கட்டும்; மேலும், அல்லாஹ்வையும் மறுமை நாளையும் ஈமான் கொண்டவர் தம் அண்டை வீட்டாரைக் கண்ணியப்படுத்தட்டும்; மேலும், அல்லாஹ்வையும் மறுமை நாளையும் ஈமான் கொண்டவர் தம் விருந்தினரைக் கண்ணியப்படுத்தட்டும்.

அபூஹுரைரா (ரழி) அவர்கள் அறிவித்தார்கள்: நபி (ஸல்) அவர்கள் கூறினார்கள்:

"யார் அல்லாஹ்வையும் இறுதி நாளையும் நம்புகிறாரோ, அவர் தனது விருந்தினரைக் கண்ணியப்படுத்தட்டும். மேலும், யார் அல்லாஹ்வையும் இறுதி நாளையும் நம்புகிறாரோ, அவர் நல்லதையே பேசட்டும் அல்லது மௌனமாக இருக்கட்டும்."