அப்துல்லாஹ் பின் முஃகஃப்பல் அல்முஸனீ (ரழி) அவர்கள் அறிவித்தார்கள்:
நபி (ஸல்) அவர்கள் (பெருவிரலுக்கும் ஆட்காட்டி விரலுக்கும் அல்லது நடுவிரலுக்கும் இடையில் வைத்து) சிறு கற்களை எறிவதைத் தடை செய்தார்கள், மேலும் "அது எந்தப் பிராணியையும் வேட்டையாடாது; எதிரியையும் கொல்லாது (அல்லது காயப்படுத்தாது); ஆனால் அது கண்ணைப் பறித்துவிடும் அல்லது பல்லை உடைத்துவிடும்" என்று கூறினார்கள்.

ஸயீத் இப்னு ஜுபைர் அவர்கள் அறிவித்தார்கள்: அப்துல்லாஹ் இப்னு முகஃப்பல் (ரழி) அவர்களின் நெருங்கிய உறவினர் ஒருவர் கற்களை எறிந்தார். அவர்கள் (அப்துல்லாஹ் இப்னு முகஃப்பல் (ரழி)) அவரைத் தடுத்தார்கள். அல்லாஹ்வின் தூதர் (ஸல்) அவர்கள் (பின்வருமாறு) கூறி கற்களை எறிவதைத் தடை விதித்திருந்தார்கள் என அவர்கள் (அப்துல்லாஹ் இப்னு முகஃப்பல் (ரழி)) கூறினார்கள்:

அது வேட்டைப் பிராணியைப் பிடிப்பதில்லை, எதிரிக்குத் தோல்வியையும் ஏற்படுத்துவதில்லை, ஆனால் அது பல்லை உடைத்துவிடும், கண்ணைப் பறித்துவிடும். அவர் (அப்துல்லாஹ் இப்னு முகதல் அவர்களின் அந்த நெருங்கிய உறவினர்) மீண்டும் அதையே (கற்களை எறியும் செயலை) செய்தார். அதன்பேரில் அவர்கள் (அப்துல்லாஹ் இப்னு முகஃப்பல் (ரழி)) கூறினார்கள்: "அல்லாஹ்வின் தூதர் (ஸல்) அவர்கள் கற்களை எறிவதை வெறுத்தார்கள் மேலும் தடைசெய்தார்கள் என்று நான் உனக்கு அறிவிக்கிறேன். ஆனால், நீ மீண்டும் கற்களை எறிவதை நான் காண்கிறேன்; ஆகவே, நான் உன்னுடன் பேச மாட்டேன்."